Manuel Cao, patrón maior da Confraría de
Pescadores da Coruña, alertou onte que a lama presente na ría do Burgo
alcanza xa a praia de Santa Cristina, situada no municipio coruñés de
Oleiros. Ata agora, a Ponte da Pasaxe –que enlaza A Coruña coa comarca–
era “a fronteira onde se detiña a lama para que non chegase ás zonas
produtivas”, explicou, pero nos últimos días o lodo alcanzou o
devandito areal. “O problema segue medrando”, denunciou o patrón maior,
que anunciou que a confraría retomará as actividades de “defensa” da
ría do Burgo mantendo conversas cos municipios “que realizan vertidos
ás augas”: A Coruña, Cambre, Culleredo e Oleiros.
“A zona
produtiva está sendo tapada pola lama e hai días que é imposible loitar
para quen non cubra o noso banco. Atrévome a chamarlle unha marea negra
e hai que loitar contra ela como cando se loitou contra a do Prestige”,
engadiu Cao, que sinalou que o barro acada os dous metros de grosor
nalgúns puntos. Na Pasaxe, os mariscadores realizan tarefas de
saneamento arando e osixenando o substrato para que non se apegue ao
fondo, pero os profesionais do mar xa non son quen de deter o seu
avance. “É como loitar con algo que é moito máis grande ca nós”,
salientou o patrón maior, que considerou que a ría debe ser “fonte de
riqueza para a comarca”.
Cao tamén censurou a recente lea entre a Xunta
e o Estado sobre as competencias á hora de sanear o estuario,
catalogado zona C pola contaminación. “Xa está ben de que se pasen a
pelota”, indicou. Neste mesmo sentido se pronunciou Manuel Baldomir,
presidente dos mariscadores de a pe, que instou ás Administracións “a
poñerse de acordo dunha vez”. “Levamos tres anos con este problema e
vivimos do marisqueo 138 persoas, un colectivo que se está reducindo
cada día”, denunciou Baldomir.
Ademais, Cao lembrou que “existe
un plan de rexeneración aprobado”pero, tal e como asegurou, “o Goberno
non está disposto a poñelo en marcha ata que desaparezan os vertidos”.
Á
xuntanza tamén acudiu Luis Taibo, vocal de IU no Concello de Cambre,
que prestou o seu apoio á confraría e atribuíu o aumento da lama á
“presión urbanística” dos concellos da área metropolitana, que “verten
á ría” e “aos depósitos de sedimentos do río Mero, que baixan á ría
cando se abre a presa de Cecebre”, precisou.
iniciativa no parlamento europeo
Taibo
anunciou que o seu partido presentará unha iniciativa no Parlamento
europeo para “acelerar” o saneamento da ría. Segundo Taibo “o Burgo
merece o mesmo tratamento que a ría de Vigo”, onde a plataforma de
mariscadores remitiu a Bruxelas unha iniciativa semellante.
